by Delle
Quetuvan lenna sa nyáre ve quétaina ostolmasse.
Andanéya lómesse herulma oryane minassenna ar tirne pella i taure, ya oscaitane i osto. Anés perestaina pá arimaite larmolma, ye tensi lá nanwenne.
En vahayallo, rimpa aiwe hortane senna, ar ú pusto i alta corco serune rancurya. Cennesses áyasse, pan langosse corco né i feanarel, ya larmolma coliláne.
I corco querne nengirya sercesse rómenna, ar holtune lúmi nelde.
Epetai herulma hanyane, sa larmolma né qualtaina, ar leltane san mina ostolma métime sinyaressar: sa i cotto me nalantuva rómello nó ré nelde...
Corco morna, corco morna
Manan rinyat or ni san?
Cillet farna anastorna
Corco morna, tyenya lán(ye)!
Cillet farna anastorna
Corco morna, tyenya lán!
Etecésiet, sa ni harna?
Láta nengitya ar maica...
Mana cesteat, merit farna?
Tensi coitan, corco saiqua!
Mana cesteat, merit farna?
Tensi coitan, heca sí!
Áva thorya, verya larmo,
Ványe tensi analenna
Telda foatyo nán astarmo
Mal vá himya sina tenna (sí)
Telda foatyo nán astarmo
Tá selyanye núya tyenna.
Haime eldaron ná fara, mal
Ulquo farnan lálde mere
Sermo, nillo avatyara
Merin matenye mi sére (yú)
Sermo, nillo avatyara
Ar nai firuvat mi sére
Corco, merin fire raina, mal
Penin quilde súlenyasse
Ai, ostonya ná úmartaina, qui
Sinyar lauvar sinwe tasse!
Ai, ostonya ná úmartaina, qui
Sinyar lauvar sinwe tasse!
Iquin, wile ostonyanna,
Epe matietya telyaina,
Cotto me rómello nalantuva,
Quete herunyan pá sa.
Cole sinyar nossenyanna
Ar nai matietya mantaina...
© 2023, Delle.
This work is licensed under the Creative Commons Attribution-NonCommercial-ShareAlike 4.0 International License. To view a copy of this license, visit http://creativecommons.org/licenses/by-nc-sa/4.0/ or send a letter to Creative Commons, PO Box 1866, Mountain View, CA 94042, USA.